یہ ممکن نہیں کہ ہم بھارت جا کر کھیلیں اور وہ پاکستان نہ آئیں، محسن نقوی

نیوز ٹوڈے :   پاکستان کرکٹ بورڈ (پی سی بی) کے چیئرمین محسن نقوی کا کہنا ہے کہ آئی سی سی سے مسلسل رابطہ ہے، امید ہے چیمپئنز ٹرافی پاکستان میں ہوگی۔

پی سی بی کے چیئرمین محسن نقوی نے لاہور میں میڈیا سے گفتگو کرتے ہوئے کہا کہ یہ ممکن نہیں کہ ہم بھارت جا کر کھیلیں اور وہ پاکستان میں نہ کھیلیں، امید ہے چیمپئنز ٹرافی پاکستان میں ہی ہوگی، جو بھی فیصلہ ہوگا ہم کریں گے۔ پاکستان کے لیے بہترین کے ساتھ آئیں۔

انہوں نے کہا کہ قذافی اسٹیڈیم بین الاقوامی معیار کا بن چکا ہے، اسٹیڈیم کی تعمیر نو کا کام 10 اکتوبر کو شروع ہوا، اسٹیڈیم کی گنجائش 35 سے 40 ہزار تک بڑھا دی جائے گی، شائقین کرکٹ کا نظارہ بہت بہتر ہوگا۔

محسن نقوی نے کہا کہ میں چاہتا تھا کہ راولپنڈی سٹیڈیم اسی وقت تیار ہو جائے، پنڈی سٹیڈیم کی رپورٹ پہلے مل جاتی تو بہتر ہوتا، ساری صورتحال دیکھنے کے بعد ہم کچھ بہتر لے کر آئیں گے۔ واضح رہے کہ انٹرنیشنل کرکٹ کونسل کے بورڈ کا اجلاس جمعہ کو ہوگا جس میں آئی سی سی چیمپئنز ٹرافی کے مستقبل پر غور کیا جائے گا۔

ذرائع کے مطابق چیمپیئنز ٹرافی کے لیے ہائبرڈ ماڈل اپنانے کا آپشن بورڈ اجلاس میں پیش کیا جائے گا، اور پاکستان کو قائل کرنے کی کوشش کی جائے گی، تاہم پاکستان پہلے ہی ہائبرڈ ماڈل کو مسترد کرچکا ہے اور اگر ووٹنگ کا فیصلہ پاکستان کے خلاف ہوتا ہے۔ پی سی بی حکومت کی مشاورت سے جواب دے گا۔