چیمپئنز ٹرافی پر ڈیڈ لاک، نیا فارمولا سامنے آگیا

02, دسمبر , 2024

نیوز ٹوڈے : آئی سی سی چیمپئنز ٹرافی 2025 پر تعطل دور کرنے کے نئے فارمولے کا نام سامنے آگیا، مسئلہ حل کرنے کے لیے پارٹنرشپ فارمولے پر غور کیا جا رہا ہے، آئی سی سی نے بھارتی کرکٹ بورڈ کو فارمولہ ماننے کا مشورہ دے دیا۔

ذرائع کے مطابق نئے فارمولے کا مقصد پاکستان کی جانب سے قانونی کارروائی سے بچنا ہے، آئی سی سی ووٹنگ کے بغیر معاملہ حل کرنے کی بھرپور کوشش کر رہی ہے۔

ذرائع کا کہنا ہے کہ نئے فارمولے کا اطلاق چیمپئنز ٹرافی سے ہوگا اور یہ 3 سال تک نافذ العمل رہے گا، نئے فارمولے کے تحت بھارت اپنے تمام میچز دبئی میں کھیلے گا۔ آئی سی سی ذرائع کے مطابق پاکستان بھی اگلے 3 سال تک اپنے تمام میچز دبئی میں کھیلے گا، بھارت کی طرح پاکستان بھی بھارت میں کوئی ٹورنامنٹ نہیں کھیلے گا۔