جیسن گلیسپی نے پاکستان ٹیم کی کوچنگ چھوڑنے کی وجوہات بتا دی

نیوز ٹوڈے :  پاکستان ریڈ بال ٹیم کے سابق ہیڈ کوچ جیسن گلیسپی نے کوچنگ چھوڑنے کی وجوہات بتا دیں۔آسٹریلوی میڈیا کو انٹرویو دیتے ہوئے جیسن گلیسپی کا کہنا تھا کہ ہائی پرفارمنس کوچ ٹم نیلسن کے معاملے سے متعلق معلومات کی کمی ناراضگی کا باعث بنی۔ مجھے ٹم نیلسن کی خدمات حاصل نہ کرنے کے فیصلے سے مکمل طور پر لاعلم رکھا گیا۔ نیلسن کے معاملے کے بعد، میں نے محسوس کیا کہ میرا کام مشکل ہو گیا ہے۔ ہیڈ کوچ کو ایک اہم فیصلے سے آگاہ نہ کرنے نے مجھے ایسا سوچنے پر مجبور کیا۔

قومی ٹیم کے سابق کوچ نے کہا کہ ماضی کے چند واقعات کے بعد اس معاملے نے مجھے یہ سوچنے پر مجبور کر دیا کہ میری ضرورت تھی یا نہیں۔ پاکستان کی کوچنگ کا میرا مقصد معدوم ہوتا جا رہا تھا۔ میرا کام صرف یہ تھا کہ وہ میچ کی صبح کھلاڑیوں کو کیچنگ کی مشق کرائیں۔

ان کا مزید کہنا تھا کہ ہیڈ کوچ کے لیے ضروری ہے کہ وہ سلیکٹرز سمیت ہر کسی سے مکمل رابطہ رکھیں۔ منصوبہ بندی کے لیے ضروری ہے کہ مجھے اسکواڈ کے بارے میں کم از کم ایک دن پہلے آگاہ کیا جائے۔ ان تمام معاملات کی عدم موجودگی میں کام کرنا مشکل ہو جاتا ہے۔

گلیسپی نے کہا کہ انگلینڈ کے خلاف پہلے میچ کے بعد نئی سلیکشن کمیٹی کی خبر گروپ پر ٹیکسٹ میسج کے ذریعے ملی۔ سلیکشن کمیٹی کے معاملے پر مجھ سے کوئی بات چیت نہیں ہوئی جب کہ بابر اعظم کو ڈراپ کرنے کا فیصلہ بھی نئی سلیکشن کمیٹی نے کیا۔