پیرا اولمپک میڈلسٹ حیدر علی کو 50 لاکھ روپے کا نقد انعام دے دیا گیا

18, دسمبر , 2024

نیوز ٹوڈے : پاکستان سپورٹس بورڈ (PSB) نے پیرا اولمپک میڈلسٹ حیدر علی کو 50 لاکھ روپے کا نقد انعام دیا ہے۔پاکستان سپورٹس بورڈ نے حال ہی میں منظور شدہ پالیسی کے تحت پیرا اولمپکس میں پاکستان کے لیے کانسی کا تمغہ جیتنے والے حیدر علی کو 50 لاکھ روپے کا نقد انعام دیا ہے۔

وزیراعظم کے مشیر برائے بین الصوبائی رابطہ رانا ثناء اللہ خان نے حیدر علی کو نقد انعام کا چیک پیش کیا۔ اس موقع پر وزیراعظم کے مشیر برائے بین الصوبائی رابطہ رانا ثناء اللہ خان نے کہا کہ حیدر علی نے اپنی محنت اور عزم سے پوری قوم کا سر فخر سے بلند کیا، حکومت کھیلوں کے فروغ اور کھلاڑیوں کی حوصلہ افزائی کے لیے ایسے اقدامات کرتی رہے گی۔

پاکستان سپورٹس بورڈ کے حکام نے بھی اس موقع پر حیدر علی کی کامیابی کو سراہا اور کہا کہ یہ ایوارڈ ان کی بہترین کارکردگی اور ملک کے لیے خدمات کا اعتراف ہے۔حکومت کی نئی پالیسی کے تحت دیگر قومی اور بین الاقوامی سطح پر شاندار کارکردگی کا مظاہرہ کرنے والے کھلاڑیوں کو بھی ایوارڈز دیئے جائیں گے۔