محسن نقوی کی سعودی شہزادے سے ملاقات، سعودی کرکٹرز کو تربیت دینے کی پیشکش

نیوز ٹوڈے :    پاکستان کرکٹ بورڈ کے چیئرمین محسن نقوی نے سعودی عرب کرکٹ فیڈریشن کے چیئرمین شہزادہ سعود بن مشعل السعود سے ملاقات کی جس میں انہوں نے سعودی کھلاڑیوں کو تربیت دینے کی پیشکش کی۔ریاض میں ہونے والی ملاقات میں سعودی عرب میں کرکٹ کے فروغ اور کھلاڑیوں کی ترقی پر تبادلہ خیال کیا گیا۔

پی سی بی کے چیئرمین محسن نقوی نے سعودی عرب کرکٹ فیڈریشن کے چیئرمین سعود بن مشعل السعود کو چیمپئنز ٹرافی ٹورنامنٹ کے میچز دیکھنے کے لیے پاکستان آنے کی دعوت دی۔ملاقات میں محسن نقوی نے کرکٹ کے فروغ اور سٹیڈیمز کی تعمیر کے حوالے سے ہر ممکن تعاون کا اعلان کیا اور سعودی عرب کے کھلاڑیوں کو تربیت دینے کی پیشکش بھی کی۔

پی سی بی کے چیئرمین محسن نقوی نے کہا کہ کرکٹ کی ترقی کے لیے پلیئرز ایکسچینج پروگرام شروع کیا جا سکتا ہے۔ سعودی عرب اپنے ابھرتے ہوئے کھلاڑیوں کو پاکستان بھیج سکتا ہے جبکہ کرکٹ کی ترقی اور سٹیڈیمز کی تعمیر کے حوالے سے بھرپور تعاون فراہم کر سکتا ہے۔

دوسری جانب سعودی عرب کرکٹ فیڈریشن کے چیئرمین نے کہا کہ ہم کھلاڑیوں کی ترقی پر کام کر رہے ہیں۔ ہم کرکٹ کے فروغ کے لیے پاکستان کے ساتھ مل کر کام کرنا چاہتے ہیں۔