پاراچنار مرکزی شاہراہ بند ہوئے 79 دن گزر گئے، کراچی میں بھی دھرنے جاری، ٹریفک پلان جاری

نیوز ٹوڈے :  ضلع کرم میں پاراچنار مرکزی شاہراہ بند ہوئے 79 روز گزر گئے جس کے باعث ادویات اور خوراک کا ذخیرہ ختم ہو گیا۔

فریقین سے مذاکرات مکمل ہونے کے باوجود گرینڈ امن جرگہ تاحال کسی حتمی فیصلے پر نہیں پہنچ سکا۔ راستے بند ہونے کے باعث علاقے میں ادویات نہیں پہنچ رہیں، پاراچنار کے اسپتالوں سے مسلسل اموات کی اطلاعات آرہی ہیں، جب کہ لوگ فاقہ کشی پر مجبور ہیں۔ پاراچنار میں بگڑتی ہوئی صورتحال کے خلاف 8 روز سے احتجاجی دھرنا جاری ہے۔ مظاہرین سے اظہار یکجہتی کے لیے اسلام آباد، لاہور، جھنگ اور مظفرآباد سمیت مختلف شہروں میں دھرنے دیے گئے۔

کراچی میں ٹریفک کی صورتحال

ٹریفک پولیس کے مطابق پاراچنار کی صورتحال پر مختلف مقامات پر احتجاج جاری ہے، ایم اے جان روڈ نمائش چورنگی ٹریفک کے لیے بند ہے، ٹریفک کو پیپلز چورنگی، گرو مندر سے سولجر بازار تک متبادل راستہ فراہم کیا گیا ہے۔

علاوہ ازیں ابو الحسن اصفہانی روڈ سے سپر ہائی وے، عباس ٹاؤن جانے والی سڑکیں بند ہیں، ٹریفک کو پیراڈائز بیکری سے فاریہ چوک تک متبادل راستہ دیا گیا ہے، فائیو سٹار چورنگی بند ہے، سروس روڈ سے ٹریفک رواں دواں ہے۔

ٹریفک پولیس کے مطابق اندرونی علاقوں میں ٹریفک کو متبادل راستہ دیا گیا ہے، شاہراہ فیصل اسٹار گیٹ سے ملیر جانے والی سڑک بھی بند ہے، ٹریفک کو ڈرگ روڈ سے راشد منہاس روڈ کی طرف موڑا جا رہا ہے۔ قومی شاہراہ ملیر 15 پل پر قائد آباد جانے والی سڑک بند ہے۔