’تاج محل شاہ جہاں نے تعمیر نہیں کیا‘؛ بھارتی عدالت میں درخواست دائر

نیوزٹوڈے: نریندر مودی کی قیادت والی ہندوستانی حکومت ہندوستان کی تاریخ سے مسلم بادشاہوں کے نقوش اور شراکت کو مٹانے پر تلی ہوئی ہے، دہلی ہائی کورٹ میں ایک مفاد عامہ کی عرضی دائر کی گئی ہے جس میں دعویٰ کیا گیا ہے کہ تاج محل شاہ جہاں نے نہیں بنایا تھا۔

کشمیرمیڈیاسروس کے مطابق ہندوتوا این جی او ہندو سینا کے صدر سرجیت سنگھ یادو کی طرف سے لائی گئی PIL میں تعلیمی نصابی کتب سے شاہ جہاں کے تاج محل کی تعمیر کے حوالے سے غلط تاریخی معلومات کو ہٹانے کا مطالبہ کیا گیا ہے۔

اس کا دعویٰ ہے کہ راجہ مان سنگھ کے محل کے انہدام اور اسی جگہ پر تاج محل کی تعمیر کا کوئی تاریخی ثبوت نہیں ہے۔اس کیس کے جواب دہندگان میں ہندوستانی حکومت، آرکیالوجیکل سروے آف انڈیا، نیشنل آرکائیوز آف انڈیا اور ریاست اتر پردیش شامل ہیں۔یادو نے آرکیالوجیکل سروے آف انڈیا سے 31 دسمبر 1631 تک تاج محل کی عمر اور راجہ مان سنگھ کے محل کی موجودگی کی تحقیقات کرنے اور عدالت کو رپورٹ فراہم کرنے کی درخواست کی ہے۔

مزید برآں، وہ ہندوستانی حکومت کو راجہ مان سنگھ کے محل کی "صحیح تاریخ" کے طور پر شائع کرنے کی ہدایت چاہتا ہے، جس کی مبینہ طور پر شاہ جہاں نے 1632 سے 1638 تک تزئین و آرائش کی تھی۔