پائلٹ کے لیٹ ہونے پر مسافر کا غیراخلاقی ردعمل سامنے آگیا، ویڈیو وائرل

15, جنوری , 2024

نیوزٹوڈے: بھارت اور پاکستان سمیت دنیا بھر میں موسم سرما کی وجہ سے دھند کے باعث پروازیں تاخیر کا شکار ہیں اور مسافروں کو کئی گھنٹے ایئرپورٹ پر انتظار کرنا پڑرہا ہے۔ بھارتی میڈیا رپورٹس کے مطابق بھارتی طیارے کی ویڈیو منظر عام پر آئی ہے جس نے دہلی سے گوا کے لیے اڑان بھرنی تھی تاہم دھند کے باعث پرواز میں تاخیر ہوئی۔ ویڈیو میں دیکھا جا سکتا ہے کہ مسافروں میں سے ایک نے غصے میں آکر پائلٹ کو تھپڑ مار دیا جس سے وہ پیچھے ہٹ گیا۔

تصادم کے دوران ایئر ہوسٹس مسافر اور پائلٹ کے درمیان آگئی جس نے مسافر کو خوب باتیں سنائیں۔ مسافر کی شناخت ساحل کٹاریہ کے نام سے ہوئی ہے جسے سیکورٹی فورسز کے حوالے کر دیا گیا ہے۔ پائلٹ نے مسافر کے خلاف دہلی پولیس میں شکایت درج کرائی جس کی بنیاد پر شکایت درج کرلی گئی اور مزید تفتیش جاری ہے۔ ویڈیو وائرل ہونے کے بعد سوشل میڈیا صارفین نے مسافر کو خوب تنقید کا نشانہ بنایا۔