پاکستانی اسنوکر پلیئر شہرام چنگیزی نے امریکا میں اہم کارنامہ انجام دے دیا

21, اگست , 2024

نیوز ٹوڈے : پاکستانی اسنوکر پلیئر شہرام چنگیزی نے امریکا میں اہم کارنامہ انجام دیتے ہوئے 147 کا بریک کھیلنے والے پہلے کیوسٹ ہونے کا اعزاز حاصل کرلیا۔

ایمبیسی اوپن سے قبل پریکٹس میچ کے دوران انہوں نے پاکستان کے سابق رینکنگ کھلاڑی فرحان ادریس کے خلاف 147 کا شاندار بریک کھیلا، یہ امریکا میں کسی بھی سطح پر ریکارڈ کیا گیا 147 کا پہلا بریک ہے، یہ بریک تقریباً 10 منٹ تک جاری رہا۔

شہرام چنگیزی کا شمار پاکستان کے نامور سنوکر کھلاڑیوں میں ہوتا ہے، وہ 2010 کے ایشین گیمز میں کانسی کا تمغہ جیتنے والی پاکستان کی سنوکر ٹیم کا حصہ تھے۔ اس کے علاوہ وہ ایشین اور ورلڈ چیمپئن شپ میں بھی پاکستان کے لیے تمغے جیت چکے ہیں۔

شہرام چنگیزی نے گزشتہ سال ٹیکساس اوپن سنوکر ٹائٹل بھی جیتا تھا۔147 کا بریک سنوکر میں سب سے بڑا ہے جسے ایک باری میں کالی گیندوں کے کور کے ساتھ تمام سرخ گیندوں کو پوٹنگ کرنے کے بعد ہر رنگ کی گیند کو پوٹنگ کرکے حاصل کیا جاتا ہے۔