چینی وزیراعظم آئندہ ماہ پاکستان کا 3 روزہ دورہ کریں گے

04, ستمبر , 2024

نیوز ٹوڈے : چینی وزیراعظم لی چیانگ آئندہ ماہ پاکستان کا 3 روزہ دورہ کریں گے۔چینی وزیراعظم کا دورہ پاکستان 2 حصوں پر مشتمل ہوگا، چینی وزیراعظم 14 اکتوبر کو اسلام آباد پہنچیں گے۔

ذرائع کا کہنا ہے کہ دو طرفہ دورے میں پاک چین تعلقات اور دیگر امور پر غور کیا جائے گا۔ چینی وزیر اعظم کے دورے کا دوسرا حصہ 15 اکتوبر سے کثیر الجہتی ہو گا، وہ 15 اور 16 اکتوبر کو شنگھائی تعاون تنظیم (SCO) کے سربراہان حکومت کے اجلاس میں شرکت کریں گے۔

چینی وزیر اعظم شنگھائی تعاون تنظیم کے سربراہی اجلاس میں چین کی نمائندگی کریں گے جو 11 سال بعد کسی بھی چینی وزیر اعظم کا پہلا دورہ پاکستان ہو گا۔سفارتی ذرائع کا کہنا ہے کہ چینی وزیراعظم کے اس دورے میں دونوں ممالک کے درمیان کئی معاہدوں پر دستخط ہونے کی توقع ہے۔