وزیر اعظم انوارالحق کاکڑ آج اقوام متحدہ کی جنرل اسمبلی سے خطاب کریں گے

نیوزٹوڈے: نگراں وزیراعظم انوار الحق کاکڑ جمعہ کو نیویارک میں اقوام متحدہ کی جنرل اسمبلی کے 78ویں اجلاس سے خطاب کریں گے۔ اپنے خطاب میں وزیراعظم جموں و کشمیر کے تنازع سمیت متعدد علاقائی اور عالمی مسائل پر پاکستان کے نقطہ نظر کو پیش کریں گے۔ انوار الحق کاکڑ اپنی نگراں انتظامیہ کی جانب سے ملک کی معاشی بحالی کو مستحکم کرنے اور ملکی اور غیر ملکی سرمایہ کاری کو متحرک کرنے کے لیے کیے گئے اہم اقدامات کے بارے میں بھی تفصیل سے روشنی ڈالیں گے۔

قبل ازیں، ممتاز امریکی تھنک ٹینک کونسل برائے خارجہ تعلقات سے خطاب کرتے ہوئے، نگراں وزیراعظم انوار الحق کاکڑ نے اس یقین کا اظہار کیا کہ پاکستان اور امریکا کے مضبوط تعلقات جنوبی ایشیا میں استحکام اور ترقی کے لیے ایک قوت ثابت ہو سکتے ہیں۔تاہم وزیر اعظم نے کہا کہ پائیدار شراکت داری راتوں رات نہیں بنتی کیونکہ ان کے لیے دونوں طرف صبر، سمجھ اور سرمایہ کاری کی ضرورت ہوتی ہے۔

انہوں نے کہا کہ پاکستان امریکہ اور ان تمام شراکت داروں کے ساتھ کام کرنے کے لیے تیار ہے، جو ایک پرامن اور خوشحال دنیا کے ہمارے وژن میں شریک ہیں، جہاں تنازعات پر تعاون کی فتح ہوتی ہے۔ انوارالحق کاکڑ نے اس امید کا اظہار کیا کہ امریکہ کی مسلسل حمایت اور شمولیت معاشی، سفارتی اور عوام کے درمیان تعلقات کو فروغ دینے میں اہم ثابت ہوگی۔

انہوں نے افغان حکومت کے ساتھ امریکی براہ راست روابط کا خیرمقدم کیا اور کہا کہ پاکستان اپنی طرف سے افغان حکام پر خواتین کے حقوق، لڑکیوں کی تعلیم اور اس بات کو یقینی بنانے کے لیے اپنے وعدوں کی پاسداری کے لیے دباؤ ڈالتا رہے گا کہ افغان سرزمین دوسرے ممالک کے خلاف دہشت گرد حملوں کے لیے استعمال نہ ہو۔