اقوام متحدہ کے نظام کو چارٹر کے اصولوں پر عملدرآمد سے مضبوط بنایا جا سکتا ہے: منیر اکرم

نیوز ٹوڈے:   اقوام متحدہ میں پاکستان کے مستقل نمائندے منیراکرم نے کہا ہے کہ چارٹر کے اصولوں پر عمل کر کے اقوام متحدہ کے نظام کو مضبوط بنایا جا سکتا ہے۔

انہوں نے کہا کہ گروپ کی رائے ہے کہ 2030 کے ایجنڈے پر عمل درآمد کو تیز کرنے کے لیے بات چیت کا عمل ضروری ہے۔انہوں نے کہا کہ گروپ نے اقوام متحدہ کے چارٹر اور بین الاقوامی قوانین کی خلاف ورزی، جغرافیائی سیاسی کشیدگی اور حل نہ ہونے والے تنازعات کو عالمی امن و سلامتی کے لیے سنگین خطرہ قرار دیا ہے۔

منیر اکرم نے کہا کہ 2030 کے ایجنڈے کو تیز کرنے کے لیے ماضی کے معاہدوں پر عمل کرنا ضروری ہے، سابقہ ​​معاہدوں میں تبدیلیاں قابل قبول نہیں۔اقوام متحدہ میں پاکستانی مندوب نے کہا کہ ایل ایم جی نے بین الاقوامی مالیاتی نظام میں اصلاحات، قرضوں کے بحران کے حل اور تجارت اور ٹیکس کے مسائل پر فوری توجہ دینے پر زور دیا۔

منیر اکرم نے سلامتی کونسل میں اصلاحات پر زور دیتے ہوئے کہا کہ طاقتور ممالک کے اسٹریٹجک مقابلے سے گریز کرتے ہوئے اصلاحات ہونی چاہئیں۔ تاریخی ناانصافیوں کو دور کرنا ہوگا۔پاکستانی مندوب منیر اکرم نے کہا کہ توقع ہے کہ اقوام متحدہ مالیاتی، تجارتی اور ٹیکس اصلاحات میں مرکزی کردار ادا کرے گا۔