غزہ سے میڈیکل کے 27 طالب علم اپنی تعلیم مکمل کرنے کے لیے پاکستان روانہ

14, اکتوبر , 2024

نیوز ٹوڈے : غزہ سے میڈیکل کے 27 طالب علم اپنی تعلیم مکمل کرنے کے لیے پاکستان روانہ ہو گئے۔مصر کے دارالحکومت قاہرہ میں پاکستانی سفارت خانے کی جانب سے جاری بیان میں کہا گیا ہے کہ فلسطینی طلباء کا پہلا گروپ پاکستان روانہ ہو گیا ہے۔

پاکستانی سفارتخانے کے مطابق فلسطینی طلباء جنگ زدہ غزہ سے تعلق رکھنے والے 192 فلسطینی میڈیکل طلباء کے گروپ کا حصہ ہیں۔ یہ طلباء پاکستان کے طبی اداروں میں اپنی میڈیکل اور ڈینٹل کی تعلیم جاری رکھیں گے۔

اعلان کے مطابق فلسطینی طلباء کو مکمل فنڈنگ کے تحت پاکستانی میڈیکل یونیورسٹیوں میں اپنی تعلیم جاری رکھنے کی سہولت دی جائے گی۔واضح رہے کہ غزہ میں گزشتہ ایک سال سے جاری اسرائیلی جارحیت کے باعث فلسطینی طلباء کی تعلیم بھی شدید متاثر ہوئی ہے۔ اسرائیلیوں کی جانب سے سکولوں اور تعلیمی اداروں کو جان بوجھ کر نشانہ بنایا جا رہا ہے۔