ایس سی او کانفرنس: چینی وزیر اعظم پاکستان پہنچ گئے، شہباز شریف نے استقبال کیا۔

نیوز ٹوڈے :    چینی وزیراعظم لی کیانگ شنگھائی تعاون تنظیم (ایس سی او) کے اجلاس میں شرکت کے لیے پاکستان پہنچ گئے۔چینی وزیر اعظم لی کیانگ اپنے وفد کے ہمراہ شنگھائی تعاون تنظیم کے اجلاس میں شرکت اور دورہ پاکستان کے لیے اسلام آباد پہنچے جہاں بچوں نے انہیں گلدستہ پیش کیا۔

نور خان ایئر بیس پر وزیر اعظم شہباز شریف، وزیر خارجہ اسحاق ڈار، وفاقی وزیر داخلہ محسن نقوی اور دیگر اعلیٰ حکام نے چینی وزیر اعظم کا استقبال کیا۔چینی وزیراعظم کی آج صدر زرداری سے ملاقات متوقع ہے اور وہ دیگر معززین سے بھی ملاقاتیں کریں گے جب کہ معزز مہمان گوادر انٹرنیشنل ایئرپورٹ کا عملی طور پر افتتاح بھی کریں گے۔

واضح رہے کہ شنگھائی تعاون تنظیم کا دورہ 15 اور 16 اکتوبر کو اسلام آباد میں ہونے جا رہا ہے جس میں مختلف ممالک کے وزرائے اعظم سمیت اعلیٰ حکام شرکت کریں گے۔

چینی وزیر اعظم لی کیانگ کا پاکستان آمد پر پیغام

پاکستان پہنچنے کے بعد چینی وزیر اعظم لی کیانگ نے اپنے پیغام میں کہا کہ انہیں شنگھائی تعاون تنظیم کے سربراہان حکومت کے 23ویں اجلاس میں شرکت اور وزیر اعظم شہباز شریف کی دعوت پر پاکستان کا دورہ کرنے پر بہت خوشی ہے۔

چینی وزیر اعظم نے کہا کہ جیسے ہی میں جہاز سے اترا تو میرا پرتپاک استقبال کیا گیا اور پاکستانی عوام کی گہری برادرانہ دوستی اور مہمان نوازی سے متاثر ہوا۔ پاکستان ایک اہم ترقی پذیر ملک، ایک ابھرتی ہوئی مارکیٹ اور ایک بڑا مسلم ملک ہے۔ پاکستان چین کا ہر موسم میں سٹریٹجک تعاون کا شراکت دار اور مضبوط دوست ہے۔

لی چیانگ نے مزید کہا کہ چینی عوام پاکستان سے پیار کرتے ہیں اور ان کی قدر کرتے ہیں۔ 73 سالوں میں دونوں ممالک نے مسلسل اعتماد برقرار رکھا اور ایک دوسرے کا ساتھ دیا۔ چین پاکستان تعلقات دو طرفہ ریاستی تعلقات کی بہترین مثال بن چکے ہیں۔