فچ نے پاکستان کی ریٹنگ اپ گریڈ کر دی

نیوز ٹوڈے :    عالمی ریٹنگ ایجنسی فچ نے بین الاقوامی مالیاتی فنڈ کے ساتھ معاہدے کے بعد پاکستان کی طویل مدتی غیر ملکی کرنسی جاری کرنے والے ڈیفالٹ ریٹنگ کو 'CCC' سے 'CCC Plus' کر دیا ہے۔بین الاقوامی ریٹنگ ایجنسی فچ نے پاکستان کی طویل مدتی غیر ملکی کرنسی کی درجہ بندی Insure Default Rating (IDR) کو ٹرپل سی سے ٹرپل سی پلس میں اپ گریڈ کر دیا ہے، جو ملکی معیشت کے بہتر آؤٹ لک کی عکاسی کرتا ہے۔

سی سی سی کی درجہ بندی بیرونی قرضوں کی وجہ سے ملک کے ڈیفالٹ کے زیادہ خطرے کی عکاسی کرتی ہے۔یاد رہے کہ 14 دسمبر 2023 کو عالمی ریٹنگ ایجنسی فچ نے پاکستان کی غیر ملکی کرنسی کی طویل مدتی ڈیفالٹ ریٹنگ 'ٹرپل سی' پر برقرار رکھی تھی۔اس سے قبل، فچ نے اکتوبر 2022 میں پاکستان کی ریٹنگ ٹرپل سی پلس سے گھٹا کر فروری 2023 میں ٹرپل سی مائنس کر دی تھی، جس کے بعد اس نے جولائی 2023 میں اسے دوبارہ ٹرپل سی کر دیا تھا۔

ریٹنگ ایجنسی نے پیر کو کہا کہ یہ اپ گریڈ بین الاقوامی مالیاتی فنڈ سے 37 ماہ کے 7 بلین ڈالر کے معاہدے کے بعد بیرونی فنڈز کی مسلسل دستیابی کے لیے زیادہ سازگار نقطہ نظر کی عکاسی کرتا ہے-فچ نے کہا کہ گزشتہ آئی ایم ایف معاہدے میں حکومت کی موثر کارکردگی نے ملک کے مالیاتی خسارے کو کم کرنے اور زرمبادلہ کے ذخائر میں اضافہ کرنے میں مدد کی اور مزید بہتری کا امکان ہے۔

تاہم انہوں نے خبردار کیا کہ اگر پاکستان چیلنجنگ اصلاحات نافذ کرنے میں ناکام رہا تو ملک کمزور ہو جائے گا۔ایجنسی نے یہ بھی کہا کہ اسے توقع ہے کہ حکومت اگست کے آخر تک اپنے شراکت داروں بالخصوص سعودی عرب، متحدہ عرب امارات اور چین سے 4-5 بلین ڈالر کی نئی فنڈنگ کی یقین دہانیاں وصول کرے گی۔انہوں نے کہا کہ بہتری کے باوجود زرمبادلہ کے ذخائر بہت کم ہیں اور اسٹیٹ بینک انہیں بحال کرنے کی کوشش کر رہا ہے۔

انہوں نے کہا کہ ہمارا تخمینہ ہے کہ جون 2023 میں 10 ارب ڈالر کے ذخائر تھے جو جون 2024 میں 15 ارب ڈالر تک پہنچ گئے، ہمیں امید ہے کہ 2026 تک یہ 22 ارب ڈالر کی سطح تک پہنچ جائیں گے۔یاد رہے کہ 12 جولائی 2024 کو پاکستان اور آئی ایم ایف کے درمیان 37 ماہ پر محیط 7 ارب ڈالر کے امدادی پیکج کا معاہدہ طے پایا تھا جس سے ملک کے مالیاتی ذخائر کی بہتری میں کافی مدد ملی ہے۔

واضح رہے کہ وفاقی وزیر خزانہ محمد اورنگزیب نے انٹرنیشنل ریٹنگ ایجنسی (فچ) کے حکام کو پاکستان کی معیشت اور میکرو اکنامک انڈیکیٹرز کو مستحکم کرنے کے لیے انٹرنیشنل مانیٹری فنڈ (آئی ایم ایف) کے ساتھ کامیاب معاہدے کے بارے میں آگاہ کیا۔

وفاقی وزیر نے فِچ کے نمائندوں کو نئے پروگرام کے نمایاں خدوخال سے آگاہ کیا، جس میں مالی سال 2025 میں ٹیکس محصولات کو جی ڈی پی کے 1.5 فیصد اور اگلے تین سالوں میں مالی سال 2025 میں 3 فیصد تک بڑھانے کا ہدف مقرر کرنا شامل ہے۔ جی ڈی پی کا ایک فیصد بھی حاصل کیا جائے گا۔